مبادئ المحاسبة المالية هي قواعد أساسية بتنظم تسجيل وتلخيص المعاملات المالية وأهمها : مبدأ الاستحقاق ( نسجل الإيرادات والمصروفات وقت حدوثها ) مبدأ الاستمرارية ( نفترض إن النشاط مستمر ) مبدأ التكلفة التاريخية ( نسجل الأصول بقيمتها وقت الشراء ) ومبدأ الإفصاح ( نوضح كل المعلومات المهمة بوضوح وشفافية)
ومن خلال في هذا المقال سنجيب على سؤال ما هي مبادئ المحاسبة ؟
ما هي مبادئ المحاسبة ؟
يمكن تعريف مبادئ المحاسبة المالية (Accounting principles) بأنها هي حجر الأساس لكل أنظمة المحاسبة الفعالة.
حيث تقوم بتوجيه العمليات المالية وتضع القواعد الرئيسية التي يجب إتباعها لتسجيل العمليات وإعداد التقارير المالية بمنتهى الدقة والشفافية .
قد يدور في ذهنك الآن سؤال واحد ما هي إذًا مبادئ المحاسبة التي تعتبر جزء لا يتجزأ من أسباب نجاح عملك أو شركتك ؟
في الحقيقة أن هذه المبادئ تجتمع معًا لتعمل على وضع ضمانات أساسية لنزاهة وشفافية المعلومات المالية .
وأيضًا تحقيق الأهداف التي تهدف إليها الشركة
ما هي أهمية مبادئ المحاسبة المالية ؟
مبادئ المحاسبة مهمة جدًا لأنها الأساس اللي بيمشي عليه شغل المحاسب يوميًا. لما تلتزم بالمبادئ دي بتقدر تسجل كل عملية مالية بشكل صحيح وواضح وده بيضمن إن حسابات الشركة تكون دقيقة ومنظمة.
من غير مبادئ محاسبة كل محاسب كان ممكن يسجل العمليات بالطريقة اللي تريحه وساعتها مفيش حد كان هيعرف يفهم أو يراجع الدفاتر، ولا نطلع تقارير مالية موثوقة.
مبادئ المحاسبة كمان بتضمن إن كل الشركات تمشي على نظام واحد فتقدر تقارن بين الشركات وبعضها بسهولة وتفهم وضع الشركة المالي بوضوح
كمان لما تلتزم بمبادئ المحاسبة بتكون محمي قانونيًا سواء قدام مصلحة الضرائب أو قدام المستثمرين لأنك بتثبت إن شغلك متسجل بطريقة صحيحة وشفافة .
باختصار : المبادئ دي مش قواعد نظرية دي اللي بتحميك كمحاسب وبتحمي الشركة وبتخلي شغلك معتمد ومعروف قدام أي جهة رسمية أو مالية
أنواع مبادئ المحاسبة
مبادئ المحاسبة بتنقسم لمجموعة قواعد أساسية كل محاسب لازم يعرفها ويلتزم بيها، وأهمها:
مبدأ الإفصاح الكامل :
لازم نظهر كل المعلومات المالية المهمة بوضوح في التقارير عشان ما نخبيش أي حاجة ممكن تأثر على القرارات.
مبدأ الاستحقاق :
نسجل الإيرادات والمصروفات في نفس الفترة اللي حصلت فيها، مش وقت استلام أو دفع الفلوس.
مبدأ الاستمرارية :
نفترض إن الشركة هتستمر في نشاطها لفترة طويلة ومافيش نية لتصفيتها قريب.
مبدأ التكلفة التاريخية :
نسجل الأصول بالقيمة اللي اشتريناها بيها، مش بالقيمة السوقية الحالية.
مبدأ الموضوعية :
لازم كل البيانات المحاسبية تكون مبنية على مستندات وأدلة واضحة، مش مجرد تقديرات أو آراء شخصية.
مبدأ الحيطة والحذر :
لازم نكون حذرين وإحنا بنسجل الأرباح والمصاريف، يعني ما نعترفش بأي ربح إلا لما يكون مؤكد، لكن المصاريف نسجلها أول ما تظهر.
مبدأ المقابلة :
نربط بين الإيرادات والمصاريف اللي اتعملت عشان نحقق الإيرادات دي في نفس الفترة المحاسبية .
دي مجموعة من أكتر الأسئلة اللي بنتسئل عنها من محاسبين وطلبة بيبدأوا طريقهم في المجال وكل سؤال فيهم بيساعدك تفهم مبادئ المحاسبة بشكل أعمق وتطبقها صح في شغلك
✅ ايه الفرق بين المبادئ المحاسبية والفروض المحاسبية ؟
السؤال ده من أهم الأسئلة اللي بتوضح الأساس اللي بتتبني عليه المحاسبة، وده الفرق بشكل مبسط :
🔹 المبادئ المحاسبية :
هي القواعد العامة والأسس اللي المحاسب لازم يلتزم بيها أثناء تسجيل وتبويب وعرض البيانات المالية زي :
- مبدأ الاستحقاق
- مبدأ الحيطة والحذر
- مبدأ الإفصاح الكامل
- مبدأ التكلفة التاريخية
دي بنعتبرها بمثابة دليل التشغيل في المحاسبة
🔹 الفروض المحاسبية :
هي افتراضات أساسية بيقوم عليها النظام المحاسبي حتى لو مش بنكتبها صراحة في القوائم لكن بنبني عليها كل الحسابات زي :
- فرض الاستمرارية (إن الشركة هتستمر)
- فرض الوحدة المحاسبية (كل كيان له حسابات مستقلة)
- فرض الفترة المحاسبية
- فرض الأساس النقدي أو الاستحقاق
دي بنعتبرها زي المسلمات اللي بنشتغل على أساسها
يعني ببساطة: الفروض = أساسات المحاسبة ** المبادئ = القواعد اللي بنتبعها في التطبيق العملي
✅ ما هو مبدأ الاستحقاق ؟ وإزاي بيتطبق في المحاسبة ؟
مبدأ الاستحقاق من أهم المبادئ الأساسية في المحاسبة، وبيفرق جدًا في طريقة تسجيل الإيرادات والمصروفات. تعال نشرحه ببساطة :
مبدأ الاستحقاق بيقول إنك تسجل الإيرادات والمصروفات في الفترة اللي حصلت فيها فعليًا سواء قبضت الفلوس أو دفعتها أو لسه يعني المحاسبة هنا مش بتركز على الفلوس دخلت أو خرجت لأ، بتركز على الحدث نفسه حصل إمتى
ازاى نطبق مبدء الاستحقاق فى المحاسبة عمليا ؟
لو قدمت خدمة لشركة تانية في ديسمبر حتى لو هتقبض في يناير 🚩 تسجل الإيراد في ديسمبر .
لو اشتريت بضاعة على الحساب في نوفمبر 🚩 تسجلها كمصروف في نوفمبر حتى لو لسه ما دفعتش
مثال عملي في المقاولات على مبدأ الاستحقاق :
شركة مقاولات نفذت جزء من مشروع إنشاء مدرسة في شهر مارس بقيمة 150,000 ريال لكن العميل اتفق إنه هيدفع المبلغ في شهر إبريل
التسجيل حسب مبدأ الاستحقاق هيكون كالتالي ( في مارس) :
150,000 من ح / العملاء
150,000 الى ح / ايراد تنفيذ اعمال
لأن الشركة نفذت الشغل فعليًا في مارس حتى لو الفلوس لسه ما وصلتش فالمحاسب يسجل الإيراد في الفترة اللي حصل فيها الإنجاز (مارس) مش الفترة اللي استلم فيها الفلوس (إبريل)
✅ هل مبادئ المحاسبة المالية بتتغير من بلد للتاني ؟
سؤال ممتاز جدًا والإجابة ببساطة المبادئ المحاسبية الأساسية نفسها زي الاستحقاق والحيطة والحذر والإفصاح بتكون واحدة في أغلب دول العالم لأنها بتعتمد على معايير محاسبية دولية زي :
- IFRS ( المعايير الدولية لإعداد التقارير المالية )
- GAAP (المبادئ المحاسبية الأمريكية)
لكن 👇الاختلاف بيظهر فى 3 اشياء
- القوانين البلد : كل بلد ليه قوانين ضرائب وتمويل بتأثر على طريقة تطبيق المبادئ دي .
- المعيار اللي الدولة بتطبقه : في دول بتلزم الشركات باتباع IFRS ودول تانية بتطبق GAAP ودول بتعمل نظام محلي خاص بيها متأثر بالمعايير العالمية
- طبيعة النشاط والقطاع : مثلاً المحاسبة في شركات المقاولات ليها تطبيقات خاصة ممكن تختلف شوية في التفاصيل حسب الدولة
المبادئ المحاسبية الأساسية واحدة، لكن طريقة تطبيقها ممكن تختلف حسب الدولة والنظام المحاسبي اللي بتتبعه
✅ كيف تؤثر مبادئ المحاسبة على إعداد القوائم المالية ؟
مبادئ المحاسبة هي الأساس اللي بيتبني عليه شغل المحاسب وبدونها القوائم المالية ممكن تطلع غير دقيقة أو مضللة
مثال : فيه مبدأ اسمه الاستحقاق المبدأ ده بيقول إنك لازم تسجل الإيرادات والمصروفات في وقت حدوثها مش وقت دفع الفلوس أو استلامها
يعني لو قدمت خدمة في ديسمبر وفلوسها دخلت في يناير لازم تسجلها في ديسمبر . ولو ما التزمتش بالمبدأ ده ، القوائم هتعكس أرباح أو خسائر غير حقيقية وده بيأثر على قرارات الإدارة والمستثمرين
كمان فيه مبدأ اسمه الثبات يعني تفضل تستخدم نفس الطريقة المحاسبية كل فترة عشان اللي يقرأ القوائم يقدر يقارن بين السنوات بسهولة
الخلاصة : مبادئ المحاسبة بتضمن إن القوائم المالية تكون واضحة ، عادلة ، ومنظمة وده بيساعد أصحاب الشركات والمحاسبين في اتخاذ قرارات صحيحة
✅ ما هي أخطر الأخطاء الناتجة عن تجاهل مبادئ المحاسبة ؟
تجاهل مبادئ المحاسبة ممكن يسبب أخطاء كبيرة تؤثر بشكل سلبي على الشركة أو المؤسسة ومن أخطرها :
- تضليل الإدارة في اتخاذ القرارات : لما الأرقام تكون غير دقيقة الإدارة ممكن تاخد قرارات غلط زي التوسع في وقت الشركة خسرانة أو تقليل التكاليف وهي فعليًا مش عالية
- بيانات مالية غير واقعية : من غير الالتزام بمبدأ مثل الاستحقاق ممكن تبان الشركة رابحة وهي في الحقيقة عندها مصاريف كتير لسه ما تسجلتش .
- مشاكل ضريبية وقانونية : الدولة بتطلب تقارير مالية دقيقة ولو البيانات فيها تلاعب أو عدم التزام، ممكن تتعرض الشركة لغرامات أو مراجعة من الضرائب.
- فقدان ثقة المستثمرين أو البنوك : أي طرف خارجي بيحب يطّلع على قوائم مالية نظيفة وواضحة ولما يلاحظ تضارب أو لخبطة هيفقد الثقة في الشركة.
- صعوبة المقارنة بين الفترات المالية : لما ما تلتزمش بمبدأ الثبات الأرقام في كل سنة هتتحسب بطريقة مختلفة وده يخلي من الصعب تعرف هل الشركة بتتحسن ولا لأ.
مبادئ المحاسبة مش قوانين نظرية وخلاص، دي أدوات بتخلي شغلك كمحاسب منظم ومحمي وتخلي الأرقام تعبر عن الواقع الحقيقي
تحميل كتاب مبادئ المحاسبة المالية مجانا
