ده فخ البراندات ” اللطيفة ” المشروع اللطيف اللي بيحاول يرضي الكل… هو مشروع فاشل …. ليه ؟
لأن علشان ترضي الكل لازم تبقى من غير شخصية ومن غير رأي ومن غير طعم
زي العيش التوست …
مفيش حد بيكرهه بس في نفس الوقت مفيش حد بيحبه بجد

لو ظهرت العلامات دي.. يبقى شركتك مريضة في ارضاء العملاء
- بتقول تمام لأي طلب من أي عميل حتى لو الطلب غبي .
- بتخاف تزود السعر علشان محدش يزعل .
- البراند بتاعك موجه لكل الناس , لكل الشركات , ولكل الأذواق .
- بتخاف من الكومنتات السلبية وبتعتبرها نهاية العالم . النتيجة ؟
الموت بالمتوسطية : النتيجة الحتمية لأرضاء العملاء
لما تحاول تبقى كل حاجة لكل الناس اللي بيحصل إنك بتبقى ولا حاجة لأي حد
البراند بتاعك بيبقى متوسط , منتجك بيبقى متوسط , وزباينك كمان بيبقوا متوسطين
المتوسطية هي مقبرة البزنس
أقوى كلمة في مشروعك هي ” لأ “
لأ… الخدمة دي مش معمولة ليك
لأ… ماينفعش نعمل التعديل دا عشان بيأثر على الجودة.
لأ… السعر دا مش مناسبنا ومش دا اللي بنشتغل بيه.
كل” لا ” بتقولها للعميل الغلط هي ” أيوه ” بصوت عالى للعميل الصح
الحل ؟
اعرف الأول مين اللي مش عايز تشتغل معاه
البراندات الكبيرة ما بتعرفش نفسها باللي هي معاه لكن بتعرف نفسها باللي هي ضده
اختار بوضوح مين اللي مش عايزه يكون عميلك ولما تعمل كده الناس الصح هتعرف إنك ليهم
مثال مطعم نباتى
مطعم بيقدم اكل نباتي بيرفض تماما أي زبون عايز ياكل لحمة بالحركة دي هو ما خسرش زباين هو بقى بطل لكل النباتيين
رفضه لـ 90٪ من السوق خلاه يمتلك الـ10٪ الصح
مثال تانى : نظام ابل
ابل ما بتحاولش ترضي مستخدمين الويندوز عندها نظامها الخاص، وبتقول ببساطة: “ده نظامنا … يعجبك أو لا “
دا يسمى الغرور المدروس ده هو اللي بيخلق الولاء وبيخلي عندها قبيلة بتحارب لها مش مجرد زباين
وده بيخلق شعور عند العميل إنه مختار ومميز وكأنه اشترى مكانة اجتماعية مش مجرد منتج .
الخطة العملية :
اكتب قايمة بكل أنواع الزباين اللي مش عايز تتعامل معاهم :
- البخيل – اللي دايما بيقارن الأسعار بس مش الجودة.
- المتردد – اللي بياخد منك وقت ومجهود وبالنهاية يختفي.
- اللي مش شايف قيمتك – بيشوفك مجرد ” مؤدي خدمة ” مش شريك نجاح
- اللي عايز كل حاجة ببلاش – دا مش عميل دا مشروع وجع دماغ
- اللي دايما بيشتكي – حتى لو عملت له المستحيل مش هيرضى
وبعد كده عدل تسويقك بحيث ينفر الفئة دي بالذات
الخلاصة :
وظيفتك مش إنك تجمع أكبر عدد من الزباين وظيفتك إنك تجمع أكبر عدد من الزباين الصح
اللي بيحبوا شغلك ومستعدين يدفعوا تمنه.
لو الكل بيحب البراند بتاعك… يبقى أكيد بتعمل حاجة غلط
المقال ده مجرد رأيي وتجربة شخصية في رحلة البزنس ممكن أكون غلط بس الأكيد إنك هتطلع منه بحاجة تفيدك.
لو الموضوع شدك شوف كمان المقالات اللي تحت 👇 يمكن تفتحلك زاوية جديدة تشوف منها شغلك
قائمة مهامك To-Do Listهي مجرد قايمة بالحاجات اللي هتأجلها لبكرة ارميها في الزبالة