الدليل الشامل لكشف تسوية البنك

مذكرة تسوية البنك Bank reconciliation
ـــــــــــــــــــــــــــــــــــــــــــــــــــــــــــــــــ

عبارة عن مذكرة يتم اعداداها  شهريا وهى  عبارة عن ايه ؟ 

فكرتها بشكل بسيط 

انت عايز تساوى رصيدك الموجود فى السيستم ” الدفاتر” برصيدك الموجود فى البنك عشان يبقوا متطابقين

هتجيب كشف حساب البنك من البنك وتطبع كشف البنك من السيستم وتطابق (يدويا او اكسيل) وتطلع الاختلافات

ما لم يثبت عندك فى كشف البنك بالسيستم اثبته واللى اتثبت عندك و لم يثبت فى كشف البنك بتشيله حتى تصل الى الرصيد الصحيح المعدل فى السيستم ” دفاترك “

ويوضح ذلك في مذكرة التسوية

برضه مش فاهم وضح اكتر

مثلا
لقيت فى كشف البنك عمولات مدينة ب 50 ريال بتبص عندك فى الكشف ملقيتهومش كده محتاج تثبتهم العمولات المدينة دى قللت رصيد البنك بس رصيد البنك فى السيستم زايد بيهم فلازم تقللهم بالقيد ده👇

50 من ح/ عمولات (ايا كان مسمى المصروف عندك او العمولة دى تخص ايه وليكن رسوم او عمولة تجديد خطاب ضمان)

50 الى ح/ البنك

طيب لقيت عندك فى حساب البنك فى السيستم صرف شيك بقيمة 40000 لكن روحت بصيت فى كشف البنك لقيتهم لسه موجودين معنى كده ان رصيد البنك عندك قل لكن فى كشف البنك زايد هنا لازم قيد تسوية زى ده👇

40000 من ح/ البنك

40000 الى ح/ اوراق دفع او شيكات مرسلة تحت التحصيل

كده انا زودت رصيد البنك عندك فى السيستم تانى هنا تاخدنا للقطة حلوة جدا ايه هى بقى👍👇

اقولك عشان وجع القلب وانك لازم تريح نفسك فى شغلك مترميش اى حاجه ع البنك والسلام وتتعب نفسك فى التسوية بعد كده 

ازاى

يعنى انت طلعت من عندك شيك لسه متصرفش متروحش ترمى على البنك 👀 استخدم حسابات وسيطة زى ح اوراق قبض و ح اوراق دفع و ح شيكات مرسلة او صادرة تحت التحصيل او ح شيكات واردة تحت التحصيل شغلهم معاك
ممكن تشتغل بحساب أوراق قبض او ح دفع فقط وخلاص وممكن تشتغل ب ح شيكات صادرة او واردة بجانب ح اوراق القبض والدفع 👌

تعالى اوضحلك اكتر بالقيود 

*_ استلمت شيك من عميل

من ح/ اوراق قبض

الى ح/ العميل

*_ ارسلت الشيك للبنك للتحصيل (اكثر متابعة ورقابة)

من ح/ شيكات واردة تحت التحصيل

الى ح/ اوراق قبض

ولما الشيك يتحصل (هتعرف من كشف البنك لو فيه امكانية المتابعة اون لاين او لما تجيبه عشان التسوية)

من ح/ البنك

الى ح/ شيكات واردة تحت التحصيل

انت تلقائى هتبقى صاحى للشيكات اللى متحصلتش لسه او متدفعتش لسه او اللى اترسلت للتحصيل او الصرف و بمجرد عرض كشف حساب اوراق القبض والدفع او شيكات صادرة وواردة هتعرف التفاصيل كلها بدل ما تقعد تدور فى كشف حساب البنك وتتوه فيه على ما تطلع تقرير

لو معاك برضه سيستم كويس هيبقى فيه تقارير كويسة تقدر تطلع منها تفاصيل اى حساب فى شكل تقرير ظريف كده لو الادارة طلبته مثلا👌

طيب معلش مكان الحسابات دى فين فى دليل الحسابات ؟

مكانها يا طويل العمر

ح /اوراق القبض وشيكات واردة دى اصول متداولة – ارصدة مدينة اخرى

وح /اوراق الدفع وشيكات صادرة التزامات متداولة – ارصدة دائنة اخرى

اكتب تعليق

لن يتم نشر عنوان بريدك الإلكتروني. الحقول الإلزامية مشار إليها بـ *